wirklich wahr

oa stund von minga
wennst d’zwölfa übalebst
gibt’s an bauernhof in eiglsberg
zwischen ampfing und isen
do is sie aufgwachsn
do war ihr schui
de jahreszeitn ois lehra
wind, wald und wiesn

wirklich wirklich wirklich wahr
yoladireidu direiduyo

nochm deutschn herbst
vorm kaltn kriag
schlaghose sei mei zeuge
dass i jetz ned liag
war sie hoaß wia donna summer
im schwabylon
durch an weißweißn himmel
mitm ofarohr ins gebirg

wirklich wirklich wirklich wahr
yoladireidu direiduyo

wieda dahoam in eiglsberg
an der hand an kloana schraz
is scho bsuffa eine zum eggerbräu
aba hod ned vui vazoit
i muass nix zum sagn habn
i brauch a ansprach
sog o wos is trumpf
mia langt schneiderfrei

wirklich wirklich wirklich wahr
yoladireidu direiduyo

i hoit koa ansprach
stellts ihr koane fragn
triumph is ned kritisch
i bleib schneiderfrei

wirklich wirklich wirklich wahr
yoladireidu direiduyo