a oida bekannter hod an herzinfarkt ghabt
mei bruada steht ohne jede regung am grob
er steht einfach unbeteiligt rum
und nur oamoi huscht a lacha über sei gsicht
wia da pfarrer uns alle as ewige lebn vaspricht
der oide bekannte hod eam manchmoi gschlagn
damois hod er no sovui angst ghabt
hod er no sovui glogn
und trotzdem warn de schläg so oft
an unserm gerechtigkeitsgfühl vorbei
er war ned de ursach
er war as sypmtom
de watschn warn für sei muata bestimmt
den oidn bekannten hod sei frau betrogn
mei bruada war wohl ned sei sohn
der oide bekannte war am feldrand wenn mei bruada gspuit hod
er war nur aufgstellt
weils unsern oidn braucht ham zum fahrn
vier halbwüchsige im auto
sechs halbe in der birn
mia warn ned de ursach
mia warn nur as symptom
er wollt am wochenend ned alloa sei
und sei frau hod eam betrogn
den oidn bekannten hod jetz a herzinfarkt dawischt
irgendwia glaubn alle, dass so besser is
mei bruada fahrt zruck noch minga
i noch berchtsgodn
unser muata war ned do
sie hodn eh immer nur betrogn
Martin Wimmer 